កំពង់ស្ពឺ៖ ពិធីបុណ្យច្រត់ព្រះនង្គ័លឆ្នាំនេះ នឹងធ្វើឡើងនៅទីព្រះស្រែក្នុងបរិវេណមន្ទីរអប់រំយុវជន និងកីឡាខេត្តកំពង់ស្ពឺ។ នេះបើតាមការផ្សាយព័ត៌មានរបស់រដ្ឋបាលខេត្តកំពង់ស្ពឺ។
ឆ្នាំនេះពិធីច្រត់ព្រះនង្គ័លនឹងប្រព្រឹត្តឡើងនៅថ្ងៃទី២៦ ខែឧសភា ឆ្នាំ២០២៤។ កាលឆ្នាំមុនប្រព្រឹត្តឡើងនៅទីព្រះស្រែ ក្នុងបរិវេណកីឡដ្ឋាន នៅភូមិរូង ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ក្រោមព្រះរាជាធិបតីភាព ព្រះកុរណាព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី។
ព្រះរាជពិធីច្រត់ព្រះនង្គ័ល តែងតែប្រារព្ធឡើងជារៀងរាល់ឆ្នាំក្នុងខែពិសាខ ដែលធ្វើឡើងក្នុងគោលបំណងផ្សងមើលប្រផ្នូលរបស់ស្រុកទេស ទៅតាមការបរិភោគរបស់ «គោឧសភរាជ»។ ម្យ៉ាងទៀតព្រះរាជពិធីបុណ្យនេះ ក៏ជាការដាស់តឿនក្រើនរម្លឹក ដល់ប្រជាពលរដ្ឋខ្មែរ ដែលពឹងផ្អែកលើការធ្វើកសិកម្មជាចម្បងនោះ ឱ្យបានដឹងថា រដូវធ្វើស្រែចម្ការបានចូលមកដល់ហើយ៕
